स्कूलसँग नाता, टुटेको सम्झिएँ

साथीभाइ सबै, जुटेको सम्झिएँ !
स्कूलसँग नाता, टुटेको सम्झिएँ !!

किनेर खान, दिन्नथे पैसा !
खाजामा मकै, भुटेको सम्झिएँ !!

विहानको पढाइ, बैशाखको गर्मी !
फर्किंदा बरफ, लुटेको सम्झिएँ !!

दिनचर्या थियो, नहरमा नुहाउने !
ठोक्किएर टाउको, फुटेको सम्झिएँ !!

भागेर जंगलमा, मकैडुम्री खाँदा !
असिनाले कत्ति, चुटेको सम्झिएँ !!

पढाइमा भन्दा, खेल्नैमा ध्यान !
दिनभरि बेन्चमा, उठेको सम्झिएँ !!

उपद्रो सबै, आमाले भन्दा !
ढाडभरि सरले, कुटेको सम्झिएँ !!

एसएलसी दिई, सबै लाखापाखा !
को-कहाँ पुगे, छुटेको सम्झिएँ !!