साथीभाइ सबै, जुटेको सम्झिएँ !
स्कूलसँग नाता, टुटेको सम्झिएँ !!
किनेर खान, दिन्नथे पैसा !
खाजामा मकै, भुटेको सम्झिएँ !!
विहानको पढाइ, बैशाखको गर्मी !
फर्किंदा बरफ, लुटेको सम्झिएँ !!
दिनचर्या थियो, नहरमा नुहाउने !
ठोक्किएर टाउको, फुटेको सम्झिएँ !!
भागेर जंगलमा, मकैडुम्री खाँदा !
असिनाले कत्ति, चुटेको सम्झिएँ !!
पढाइमा भन्दा, खेल्नैमा ध्यान !
दिनभरि बेन्चमा, उठेको सम्झिएँ !!
उपद्रो सबै, आमाले भन्दा !
ढाडभरि सरले, कुटेको सम्झिएँ !!
एसएलसी दिई, सबै लाखापाखा !
को-कहाँ पुगे, छुटेको सम्झिएँ !!
स्कूलसँग नाता, टुटेको सम्झिएँ
Read User's Comments(0)
सम्झिएर रुन्न अब
पर्दैन भो देख्दा मलाई, घरको दैलो थुन्न अब !
हाटबजार चोक गल्ली, कतै पनि हुन्न अब !!
सोचेजस्तै सप्तरंगी, हुन्न जीवन थाहा पाएँ !
सस्तो छैन आँसु मेरा, सम्झिएर रुन्न अब !!
सुख-दुःख आँसु-हासो, त्यसैले त जिन्दगी छ !
जति पीर परोस् अझै, आँसुले मन धुन्न अब !!
ढुक्क भई हिँड तिमी, छेक्नेछैन बाटो कहिल्यै !
सत्य-सत्य धरोधर्म, तिमीलाई छुन्न अब !!
होलान् दुःख तिम्रा पनि, मुटुभित्र चोट अनेक !
छाडिदेऊ षडयन्त्रका, अनेक ताना बुन्न अब !!
साँचो प्रेमको बदलामा, उपहास सहुँ कति !
तय गर मार्ग आफैं, दिएँ मौका चुन्न अब !!
औंसीमात्र कहाँ होला, पूर्णिमा नि आउँछ पक्कै !
विरहका मेरा भाका, पर्दैन भो सुन्न अब !!
Subscribe to:
Posts (Atom)