ठिक्क पारी रा'का छन् रे चुकसँगै नुन

सभासद् हो ! जनताले सोधिरा'का छन् ।
जारी होला समयमै 'नयाँ संविधान ?'
दुई वर्षमै लेखिसक्ने वाचा बिस्र्यौ कि !
हिसाब गर्नै आएन कि, बाँकी कति छन् ?

'संविधान' भन्ने कुरै बुझेनौ कि खोइ !
सोच्नैपर्ने बनायौ नि तिमीले नै झन् ।
कुरा होइन, कामचाहिँ सबले खोजेका ।
आजभोलि भन्दाभन्दै नजिकियो दिन ।

दिनैपिच्छे शंकामात्रै बढिरा'का छन् ।
जनआक्रोस् उसैगरी चुलिएका छन् ।
मुख्य जिम्मेवारीबाट बहलायौ मन् ।
होस पुर्याइ काम गर बाँकी कति छन् ?

'नयाँ नेपाल' बनाउने फुर्ति लगाउँछौं ।
गरेका त के नै छौ र फुर्तिमात्रै हुन् ।
कति धेरै ढुक्क थिए जनता जनार्दन ।
लोप्पा नै पो खुवाउछौं कि चिन्ता बढ्यो झन् ।

बजेट पारित नभा'कोमा चिन्तित देखिन्छौ ।
चिन्ताको त्यो कारण पनि सबले बुझ्याछन् ।
ढिला अझै भा'को छैन भन्छन् सभामुख ।
निराश छैनन् जनता, आशा जीवित छन् ।

कसैप्रति रीस छैन सदभाव नै छन् ।
आक्रोस कति पोखेछ भन्ने ठान्दाहुन् ।
योभन्दा त जनता धेरै आक्रोसित छन् ।
विचार गर गाउँ फिर्ने, छ कि छैन मन ?

आफ्नै भन्न पाउनेखालको बनोस् 'संविधान' ।
धेरै 'तिमीहरु' भन्दा जनता सचेत छन् ।
जनता जागे के होला गर आँकलन ।
ठिक्क पारी रा'का छन् रे चुकसँगै नुन ।